١. د سیمه‌ییزو سوداګریزو آسانتیاوو پیاوړتیا

د کابل-جلال‌اباد لویه لاره د افغانستان او پاکستان ترمنځ د سوداګریزې راکړې ورکړې د اسانولو لپاره خورا حیاتي ارزښت لري. پاکستان لا هم د افغانستان د ستر سوداګریز شریک په توګه پاتې دی، او د تورخم پوله د افغانستان د صادراتو او وارداتو لپاره مهمه لار ده، چې خوراکي مواد، ساختماني مواد، کرنیز محصولات او نور مصرفي توکي پرې لېږدول کېږي چې د افغانستان کورني بازارونه پرې ولاړ دي. د دې لارې د دویم خط له جوړېدو سره به د دواړو هېوادونو ترمنځ د لېږد وخت، ځنډونه او ستونزې کمې شي، او سوداګریز توکي به په آسانۍ سره انتقال ومومي. دا په ځانګړي توګه د تازه میوو او کرنیزو محصولاتو ته مهم دی، چې لنډه موده لري او بازارونو ته د رسېدو لپاره پر چټک او خوندي لېږدولو متکي دي.

٢. د کورنیو تولیداتو او بازار رسونې ملاتړ

د کابل او تورخم ترمنځ د ترانسپورټي زیربناوو پراختیا به د افغانستان لپاره د مهمو توکو د عرضې په زنځیر کې د پام وړ ملاتړ وکړي. دا لاره د پلازمینې او د پاکستان د صنعتي مرکزونو ترمنځ یو مؤثر مسیر برابروي، چې د کابل په ښاري بازارونو کې د توکو په دوامداره رسونه کې مرسته کوي. دا کار په افغان ښارونو کې د توکو د کمښت مخنیوی او د بیو د ثبات سبب کېږي، او خلک به اړین توکي په مناسبه بیه تر لاسه کوي. سربېره پر دې، د ترانسپورټي لارو پراختیا به د هيواد تولید ته هم وده ورکړي، ځکه چې تولیدونکي کولای شي خپل محصولات په اسانه توګه کورنیو او نړیوالو بازارونو ته ولېږدوي، چې دا د افغانستان کرنې او صنعت ته پراختیا ورکوي.

٣. په نړیوالو سوداګریزو دهلېزونو کې د افغانستان د رول پیاوړتیا

افغانستان په ستراتیژیکه توګه د جنوبي آسیا او مرکزي آسیا ترمنځ د سوداګریزو توکو د تګ راتګ یوه طبیعي لاره ده. د دې لویې لارې دویم خط له جوړېدو سره د افغانستان موقعیت د سوداګرۍ د نورو پروژو لکه د چین-پاکستان اقتصادي دهلېز (CPEC) او نورو هغو پروژو کې چې مرکزي آسیا له پاکستان بندرونو سره نښلوي، لا پیاوړی کېږي. د کابل-جلال‌اباد مسیر ته وده ورکول به د افغانستان او سیمې د ترانزیت د مرکز په توګه د پیاوړتیا سبب شي، چې د نړیوالو پانګوالو لپاره به د پانګونې فرصتونه زیات کړي او د سیمې هېوادونو سره به د سوداګریز پوتنشيل په زیاتولو کې مرسته وکړي.

٤. د لېږد لګښتونو کمښت او د ترانسپورټي خوندیتوب زیاتول

اقتصادي تحلیلونه ښيي چې ترانسپورټي لګښتونه د سوداګریزو توکو پر سیالۍ باندې خورا اغیز لري. د دې لویې لارې پراختیا به د لېږد شرکتونو او سوداګرو لپاره د عملیاتي لګښتونو په کمولو کې مرسته وکړي، د سون توکو په مصرف، د ترافيکي پېښو په کمښت، د وسایطو او توکو له مينځه تللو او د ترافیکي ګڼه‌ګوڼې په وخت کې د وخت ضایع کېدو د کمښت برخه کې خورا ډيره مرسته وکړي. دا د ترانسپورټي لګښتونو په کمولو سره د افغان محصولاتو په بهرنیو بازارونو کې د سیالۍ وړتیا زیاتوي، چې د صادراتو عواید به یې لوړ کړي. سربېره پر دې، په دې مسیر کې د خوندیتوب ښه والی به د شرکتونو لپاره د زیانونو کچه راټيټه کړي او د عرضې زنځیر په اعتبار کې به د پام وړ زیاتوالی راولي.

٥. غیر مستقیمى اقتصادي اغیزې: د کارموندنې او د سیمه‌ییز اقتصادي فعالیت وده

دا لویه زیربنايي پروژه غیر مستقیمې اقتصادي ګټې هم لري. چى دى سره د جوړولو په مرحله کې ګڼو کاريګرو ته د دندو زمينه هم برابريږي چې دا د لویې لارې پر مسیر سیمې اقتصاد ته وده ورکوي. د سړکونو ښه والی به نوي کاروبارونه او خدمتونه رامنځته کړي، لکه د موټرو د ترمیم ورکشاپونه، د تیلو ټانکونه او د خوړو پلورنځي، چې د ګڼ شمېر ترافیک لپاره به خدمتونه برابر کړي. د وخت په تېرېدو سره، دا اقتصادي فعالیتونه به څو چنده ګټور تمام شي چى په کابل او جلال‌اباد کې به اقتصادي وده راولي، او د ځایي ټولنو د ژوندانه په معیارونو کې به پرمختګ راولي.

٦. د زيربنا د جوړښت عملي کولو لپاره شفافه مالي ژمنتیا

د دې پروژې د عملي کولو ماډل چې په شفاف ډول راټولېدونکو ماليو باندې تکیه کوي په ځانګړي بانکي حساب کې زیرمه کېږي او د ماليې وزارت له لوري به ددې پروژې پر جوړښت مصرفيږى، چى دا د دې پروژې د جوړښت لپاره دوامداره ژمنتیا څرګندوي. د ماليى پر بنسټ جوړونه نه یوازې دا چې پروژه پخپله مخکې ځي، بلکې د لویې لارې د ساتنې او راتلونکو پراختیاوو لپاره دا ډاډ ورکوي چې بهرنیو مرستو ته به اړتیا نه وي. که دا ماډل په شفاف ډول اداره شي، نو د افغانستان د نورو مهمو زیربناوو پروژو لپاره هم یوه ښه بېلګه کېدای شي.

٧. د افغانستان په سوداګریز لوژستیک کې پیاوړتیا

په کابل-جلال‌اباد لویه لاره کې د زیاتېدونکي سړک ظرفیت به د افغانستان په سوداګریزو لوژستیکي شاخصونو کې پرمختګ چې د ګمرکي مؤثریت، د ترانسپورټ د زیربناوو د کیفیت، او د نړیوالى ليږدونې اسانتیا په برخو کې د یو هېواد د فعالیت کچه ارزوي پرمختګ راولي. لوژستیکي پرمختګ افغانستان د سوداګریز شریک په توګه سیالوي، چې ممکن بهرني پانګوال راجلب کړي او د هېواد اقتصادي مقاومت زیات کړي، په دې سره به د دى سوداګرۍ له لارې د سواداګرو کچه وغځيږي.

د کابل-جلال‌اباد لویې لارې پراختیا د افغانستان د اقتصادي زیربنا په پرمختګ کې یو مهم ګام دی. د دې لویې لارې دویم خط یوازې یو داخلي پرمختګ نه دی، بلکې د افغانستان په سیمه‌ ییز سوداګریز پوټنشیل کې یو مهم ګام دی. د دې لارې له لارې به د تورخم سوداګریز مسیر او کابل ترمنځ اړیکې لا پیاوړې شي، چې د افغانستان سوداګریز پوټنشیل به زیات کړي، د بیو ثبات ته به وده ورکړي، او په ګڼو اقتصادي برخو کې به پرمختګ راولي. د یو غوره مالي همکارۍ ماډل او په دوامداره توګه د پرمختګ پر بنسټ، دا پروژه د افغان اقتصاد د بدلون وړتیا لري او په نړیوال بازار کې د افغانستان د وڼدې اخيستې د پیاوړتیا سبب ګرځيدلى شي، چې د سوداګرو او ځایي وګړو لپاره به په راتلونکو کلونو کې خورا ډيرې ګټې ورسوي.